غير اسلوب حياتك ❤

يا هله بيكم ......

اليوم راح اسولفلكم شلون تغير اسلوب حياتي  فتحلي الكثير من الفرص و غير تفكيري ,

قبل سنتين كنت شخص لا يوجد لحياتي اي معنى كان كل وقتي ضايع في استخدام السوشل ميديا و مشاهدة المحتوى التافه الذي لا يضيف للحياة اي شيء جديد , وصلت بيه المرحلة استخدم المبايل 12 ساعة باليوم صرت احس روحي زايد بالمجتمع الى ان .........

صار اليوم الي شفت فيديو قلب الموازين  و خلاني احتقر روحي بذيج اللحضة قررت ان اغير اسلوب حياتي 

اول شيء سويته نظفت كل تطبيقات السوشل ميديا من الناس الي محتواهم ما بي اي هدف (( شخص ينشر يوميات او بنت مشهورة فقط لان جميلة و مدري شنو من هاي الكلاوات و السخافات كلها الغاء المتابعة)) و بديت من الصفر اذا الشخص ميقدملي اي معلومة  ممكن تفيدني و تغير حياتي ميستحق ان اتابعه و اتفاجئت بالنتيجة بعد اسبوع صارت الساعة الي استخدم  المبايل كمية المعلومات الي احصل عليها رهيبة و اتفتحت مداركي على شغلات ما كنت يوم من الايام اتوقع  افكر و اتناقش بها

و اتعلمت شغلة غيرت منظوري عن النجاح ....

النجاح ميجي من فرصة لان الفرص تجي دائما لكن هل انت تكون مستعد لهاي الفرصة ,  شلون يعني 😐 ؟

النجاح مثل قطع الليغو لازم تبنيها واحدة فوق الاخرى مثلا اذا تجيك فرصة و شرطها ان تعرف لغة و انته متعرف ضاعت عليك  او فرصة  شرطها تعرف برمجة و انته متعرف ضاعت عليك و هكذا 

فلازم اتضل دائما تتعلم و تخزن مهارات حتى لو بعيدة عن اختصاصك او هواياتك لان لابد ان يجي يوم و تصنعلك فرصة نجاح 

هسه صار ساعه الغي هو منو اني و هيج جاي اتفلسف  👀

** اني الحسن من العراق عمري 20 سنة

س\\ حسن سؤال انته ليش جاي تكتب مدونات ؟

هذا راح يرجعنه للبداية لازم اتعلم كلشي يمر عليه و كتابة المدونات وحدة من هاي الاشياء 

س\\ زين هو انته منين عرفت المدونات ؟

وره ما صرت اتابع اشخاص ملهمين انفتحتلي فرصة في يوم من الايام ان اشارك بتحدي اسمه 29 يوم اخترعه صانع محتوى اسمه مرتضى التميمي و من خلاله اتعلمت اكتب مدونة و هواي اشياء

شفتوا شلون الاشياء مترابطة مثل السلسلة ابدي صح راح تحقق النجاح في يوم من الايام .

هسه خلي اسولفلكم شتعلمت خلال هاي 29 يوم 

اني كنت شخص كلشي ميعرف بالبرمجة بس احنه اتفقنه بالبداية اي شيء تسمعه لازم  تبحث و تتعلم فقررت ادخل لعالم البرمجة حتى لو اتعلم 10% راح اكون حققت شيء يقدمني خطوة عن باقي الناس و راح يفتحلي فرصة في يوم من الايام

بديت و شاهدت كورسات و يوتيوب و طبقت و من خلال البرمجة تطورت مهارة الطباعة العمياء على الكيبورد و انفتحت افاقي على عالم البرمجة و انتقلت من شخص ميعرف اي حرف عن البرمجة الى شخص يكدر يدخل نقاش مع مبرمجين 

و بالاخير احب انصحكم غيروا اسلوب حياتكم و اتخلصوا من العادات السلبية االي تقتل ابداعكم 

بسبب فعل بسيط و قرار اتخذته لكيت فرصة اشارك بتحدي و اتعلم برمجة و تطور عندي مهارة الطباعة على الكيبورد و يصير عندي كم مصطلحات انكليزية مختصة بعالم البرمجة و تعرفت على اكثر من 50 صديق و صديقة 

كافي بعد شتريد شبع يله روح غير روحك و ابدي من جديد 😂😘

خلي افيك عليكم هاي صور من ابداعي استمتعوا

❤❤❤

اليوم (( 20 )) ❤

يابه شلونكم 💗

(( كنت دائماً احزن و اضوج من احتاج شغلة و اني ما اعرف اسويها بس بعدين كلت لازم اخلي حد و الكه حل و شرطت على روحي كل ما اصادف شغلة و ما اعرفلها كون بعد فترة ميتكرر الشعور و يتحول الى فرح لان اني تعلمت هاي الشغلة و اجه الوكت الاستفاد منهه ))

خلي افيك عليكم شوية😅 خلال ال10 ايام الراحت ضليت اتعلم بمعدل 4 ساعات يومياً صح  الموضوع  مو سهل و هذا شي اعتيادي لان داخل على عالم جديد ما مجربه من قبل بس اخوكم متصعب عليه شغلة 😁 ما خليت موقع و كورس يعتب عليه 

كافي تفيك خلي افيدكم شوية و اشاركم الشغلات الي استخدمتهه

1- كورس يوتيوب من شخص عربي 

2- موقع w3schools بي اساسيات البايثون و اساسيات مكتبة pandas

3- موقع git hub بي مجتمع من المبرمجين يشاركون اكوادهم البرمجية 

4- برنامج visual studio code الي من خلالة نكدر نكتب الكود البرمجي الخاص بينه  

5- المكتبة الخاصة بمنصة  binance 

و هسه خلي ارجع افيك عليكم 😂😂 و اكلكم شكدرت اسوي 

كدرت اربط الكود البرمجي مالتي بمنصة التداول الي اتداول بها و اسجل دخول و اسحب اي بيانات احتاجها و ارتبها بدون ما افتح المتصفح و افوت للمنصة و اسجل دخول (  شيء عجيب صح 😉  )

هاي الصور تختصرلكم الموضوع اذا ما افتهمتوا اشجاي احجي صارلي ساعة 😁

و هنا سحبت معلومات سعر البتكوين ما 30 يوم الفاتت 

البيانات مخربطة لازم افلترها و امثلها برسم بياني 

هسة وره ما شفتوا امكانياتي الخارقة للطبيعة احب اهدي هاي البوسة 😘😘 لكل شخص بعده بهاي المدونة و وصل لهذا السطر و احيي روح الفضول و المعرفة الي عندكم 

و قبل لتروحون اني ممتن لهواي شغلات خلي اكلكم كم وحدة منهم

# ممتن للقرار الي اخذته قبل اشهر من اشتريت حاسبة و حاربت و جمعت الف الف علمود اجيب الحاسبة , لما هي كان لحد الان ما اعرف اي شيء عن البرمجة  

# ممتن للاشخاص الي تعرفت عليهم خلال هاي 20 يوم تحس اكو اكثر من 100 شخص وراك و يدعموك بكل خطوة 

اليوم (( 10 ))❤

شلونهم الحلوين و الحلوات ادري بيكم مشتاقيلي لكن و بدون تباهي كنت مشغول بالتحدي خلي اراويكم شلون ......

😂😂😂 لا اشاقه .

 خلي نحجي جديات خلال هاي ال10 ايام جاي اتعلم بمقدار 4 ساعات يومياً يعني لحد الان اني مسوي 40 ساعة تعلم و اذا ابقه مستمر على هذا المعدل احتمال اخلي بيل غيتس يشتغل عندي 😅

مثل ما عرفتوا اول ما بديت هذا التحدي مع نفسي ردت اتعلم algorithmic trading  فجبت ورقة و قلم كتبت اني شنو احتاج علمود اوصل للهدف و بديت اسئل روحي

 هل اني عندي خبرة كافية في مجال التداول ؟ اي عندي 

 هل اني عندي معلومات كافية في البرمجة ؟ لا ما عندي و كنت من اسمع كود برمجي عبالي اكلة فرنسية😂 

 هل اني عندي مهارة الطباعة بالكيبورد بسرعة ؟ لا ما عندي و الهدف مالتي يحتاج هاي المهارة , و كنت اذا اشوف واحد يكتب            سريع  و بدون ميدور على الاحرف احس عنده قوة خارقة 

 

وره ما عرفت اني شاحتاج بديت بيهن بالترتيب تعلمت اساسيات لغة البرمجة بايثون شفت كورس على اليوتيوب  و استخدمت الموقع هذا و استخدمت برنامج visual studio و الحمد لله صرت اعرف اكتب اكواد برمجية و اختبرت روحي و سويت لعبة (x,o) 

 

بعدين تعلمت اكتب على الكيبورد بدون ما اباوع و ادور على الاحرف و استخدمت الموقع هذا و النتيجة صرت سوبر مان بالكتابة هسه افيك على العالم😎 وصلت باالموقع مرحلة 132 و السرعة بمتوسط 21wpm 

و هسه وره ما تعلمت النقوصات راح اذب زروك و اغوص في عالم ال algorithmic trading و انشاء الله راح نتعلم هواي خلال 10 ايام الي تجي . صح هو مو شي سهل واحد هستوه عرف البرمجة يجي يسوي برنامج معقد بس هوه ليش اسمه تحدي, راح اخذ عقلي لاكبر مستوى يكدر عليه .

ملاحضة\ اكو هواي شغلات تغيرت عندي من بديت بهذا التحدي و ممتن الها لان صارتلي هاي الفرصة:

1- تعرفت على شباب و شابات غيروا الفكرة السوداوية الي كنت اشوف العراق بها, جيل واعي مثقف محب للتطور

2-اطورت عندي مهارة التواصل مع الاخرين 

3- انبهرت من قدرات عقلي في التعلم كمت احس روحي أينشتاين 😅

كافي بعد اروح لان اني انسان مشغول 😂 نتلاكه بعد 10 ايام 💗💓💘💖💕💝

 

اليوم الاول ❤

  ((Algorithmic Trading))

# مرحباً سنحاول قدر المستطاع ان نتعلم algorithmic trading خلال فترة 29 يوم .

$ ) اسمي الحسن طالب في كلية الصيدلة ليس لدي اي خبرة مسبقة في هذا المجال لذلك سنبدأ رحلة التعلم معاً .

اولاً )) تعريف بسيط لل Algorithmic trading هوطريقة لتنفيذ اوامر الشراء و البيع في الاسواق المالية المختلفة ( اسهم \ forex \ عملات رقمية ) اعتماداً على اوامر برمجية معدة مسبقاً و بصورة تلقائية دون الحاجة الى تدخل العامل البشري .

س ) لماذا سوف ابدأ بتعلم هذه المهارة ؟

ج) لقد قضيت 4 سنوات و انا اتعلم طرق التداول في الاسواق المالية على الرغم من عدم تمكني من التداول الفعلي في المنصات الاجنبية لكوني ساكن في بلد محظور لكن هذا لا يمكن ان يمنعني من الاستمرار في ما احب و ان الفرصة لابد ان تاتي في يوم من الايام لذلك يجب ان اكون مستعد , خلال هذه السنوات قد جمعت كم كبير من المعلومات عن هذا المجال و اصبحت شخص يفهم في التحليل الاساسي و الفني و الادارة المالية و كيفية عمل النظام الاقتصادي لكني وصلت لمرحلة ان لا يمكنني قضاء معظم  حياتي جالس امام الحاسوب في انتضار لحظة الشراء او البيع لذلك قررت ان اجد حل و بالفعل هناك حل و هو استخدام قوة الحاسوب في انجاز المهام بدلاً عني .

س) هل Algorithmic trading مجال مهم في الاسواق المالية ؟ 

ج) حسب دراسة اجراها بنك JPMorgan فأن 80% من السيولة في الاسواق المالية تتم بواسطة خوارزميات تم برمجتها مسبقاً 

ملاحظة || سيتم نشر اخر التطورات في المدونة من فترة لاخرى .

Thanks for reading